శ్రీ శ్రీ - మహాప్రస్థానం , ఖడ్గసృష్టి , సిప్రాలి, మరోప్రస్థానం

ఆశాదూతలు

స్వర్గాలు కరిగించి ,

స్వప్నాలు పగిలించి ,

రగిలించి రక్తాలు , రాజ్యాలు కదిపి ____

            ఒకడు తూరుపు దిక్కునకు !

పాపాలు పండించి ,

భావాలు మండించి ,

కొలిమి నిప్పులు రువ్వి , విలయలయ నవ్వి ___

               ఒకడు దక్షిణ దిక్కు !

ప్రాకారములు దాటి,

ఆకాశములు తాకి ,

లోకాలు ఘూకాల బాకాలతో నించి ,

                          ఒకడు దీచికి !

సింధూర భస్మాలు ,

మందార హారాలు ,

సాంధ్రచందన చర్చ సవరించి

                   ఒకడు పడమటికీ !

మానవకోటి సామ్రాజ్యదూతలు , కళా

యజ్ఞాశ్వముల్ గాలులై , తరగలై , తావులై ,

పుప్పోళ్లు , కుంకుమల్ , పొగలి సాగిరి !

శ్రీశ్రీ -మహాప్రస్థానం

దేశ చరిత్రలు -2

చిరకాలం జరిగిన మోసం ,

బలవంతుల దౌర్జన్యాలూ ,

ధనవంతుల పన్నాగాలు

ఇంకానా ! ఇకపై చెల్లవు .

ఒక వ్యక్తిని మరొక్క వ్యక్తీ ,

ఒక జాతిని వేరొక జాతీ ,

పీడించే సాంఘిక ధర్మం

ఇంకానా ? ఇకపై సాగదు .

చీనాలో రిక్షావాలా ,

చెక్ దేశపు గని పనిమనిషీ ,

ఐర్లాండున ఓడ కళాసీ ,

అణగారిన ఆర్తులందరూ ____

హటెన్ టాట్ , జూలూ , నీగ్రో ,

ఖండాంతర నానా జాతులు

చారిత్రక యథార్థ తత్వం

చాటిస్తా రొక గొంతుకతో .

ఏ యుద్ధం ఎందుకు జరిగెనో ?

ఏ రాజ్యం ఎన్నాళ్ళుందో ?

తారీఖులు , దస్తావేజులు

ఇవి కావోయి చరిత్రకర్థం .

ఈ రాణి ప్రేమ పురాణం ,

ఆ ముట్టడికైన ఖర్చులూ ,

మతలబులూ , కైఫీయతులూ

ఇవి కావొయ్ చరిత్రసారం

ఇతిహాసపు చీకటి కోణం

అట్టడుగున పడి కాన్పించని

కథలన్నీ కావాలిప్పుడు !

దాచేస్తే దాగని సత్యం .

నైలునది నాగరికతలో

సామాన్యుని జీవన మెట్టిది ?

తాజ్ మహల్ నిర్మాణానికి

రాల్లెత్తిన కూలీలెవ్వరు ?

సామ్రాజ్యపు దండయాత్రలో

సామాన్యుల సాహస మెట్టిది ?

ప్రభువెక్కిన పల్లకి కాదోయ్ ,

అది మోసిన బోయీ లెవ్వరు ?

తక్షశిలా , పాటలీపుత్రం ,

మధ్యదరా సముద్రతీరం ,

హరప్పా , మొహెంజొదారో

క్రో – మాన్యాన్ గుహముఖాల్లో __

చారిత్రక విభాతసంధ్యల

మానవకథ వికాసమెట్టిది ?

ఏ దేశం ఏ కాలంలో

సాధించిన దే పరమార్థం ?

ఏ శిల్పం ? ఏ సాహిత్యం ?

ఏ శాస్త్రం ? ఏ గాంధర్వం ?

ఏ వెల్గుల కీ ప్రస్థానం ?

ఏ స్వప్నం ?  ఏ దిగ్విజయం ?

శ్రీశ్రీ - మహా ప్రస్థానం

Sreerangam Sreenivasa Rao - Mahaa Prasthaanam

దేశ చరిత్రలు -1

ఏ దేశ చరిత్ర చూచినా

ఏమున్నది గర్వకారణం ?

నరజాతి చరిత్ర సమస్తం

పరపీడన పరాయణత్వం .

నరజాతి చరిత్ర సమస్తం

పరస్పరాహరణోద్యోగం :

నరజాతి చరిత్ర సమస్తం

రణరక్త ప్రవాహసిక్తం.

భీభత్సరస ప్రధానం ,

పిశాచగణ సమవాకారం :

నరజాతి చరిత్ర సమస్తం

దరిద్రులను కాల్చుకుతినడం .

బలవంతులు దుర్భల జాతిని

బానిసలను కావించారు ;

నరహంతలు ధరాధిపతులై

చరిత్రమున ప్రసిద్ధి కెక్కిరి .

రణరంగం కానీ చోటు భూ

స్తలమంతా వెదకిన దొరకదు :

గతమంతా తడిసె రక్తమున ,

కాకుంటే కన్నీళ్లతో .

చల్లారిన సంసారాలూ ,

మరణించిన జన సందోహం ,

అసహాయుల హాహాకారం

చరిత్రలో మూలుగుతున్నవి .

వైషమ్యం , స్వార్థపరత్వం ,

కౌటిల్యం , ఈర్షలు , స్పర్థలు.

మాయాలతో మారుపేర్లతో

చరిత్రగతి నిరూపించినవి .

చెంగిజ్ ఖాన్ , తామర్లేనూ ,

నాదిర్షా , ఘజ్నీ , ఘోరీ ,

సికిందరో ఎవడైతేనేం ?

ఒక్కక్కుడూ మహాహంతకుడు .

వైకింగులు , శ్వేత హూణులూ ,

సింధియన్లూ , పారశీకులు ,

పిండారులు , థగ్గులు కట్టిరి

కాలానికి కత్తుల వంతెన .

అజ్ఞానపు టంధయుగంలో

ఆకలిలో , ఆవేశంలో ___

తెలియని ఏ తీవ్రశక్తులో

నడిపిస్తే నడిచి మనుష్యులు

అంతా తమ ప్రయోజకత్వం

తామే భువి కధినాధులమని,

స్థాపించిన సామ్రాజ్యాలూ ,

నిర్మించిన కృత్తిమ చట్టాల్

ఇతరేతర శక్తులు లేస్తే

పడిపోయెను పేక మేడలై :

పరస్పరం సంఘర్షించిన

శక్తులలో చరిత్ర పుట్టెను .

                                 

శ్రీశ్రీ -మహాప్రస్థానం

Mahaa kavi  Sri Sri - Mahaa Prasthaanam

జయభేరి

నేను సైతం

ప్రపంచాగ్నికి

సమిధ నొక్కటి ఆహుతిచ్చాను :

నేను సైతం

విశ్వవృష్టికి

ఆశ్రువొక్కటి ధార పోశాను :

నేను సైతం

భువన ఘోషకు

వెర్రిగొంతుక విచ్చి మ్రోశాను :

*  *  *  *  *

ఎండాకాలం మండినప్పుడు

గబ్బిలంవలె

క్రాగిపోలేదా :

వానాకాలం ముసరి రాగా

నిలువు నిలువున

నీరు కాలేదా ?

శీతకాలం కోత పెట్టగ

కొరడు కట్టీ ,

ఆకలేసి కేకలేశానే :

*  *  *  *  *

నే నొక్కణ్ణే

నిల్చిపోతే __

చండ్ర గాడ్పులు , వాన మబ్బులు ,

మంచు సోనలు

భూమి మీదా

భుగ్న మౌతాయి :

నింగి నుండి తొంగి చూసే

రంగు రంగుల చుక్కలన్నీ

రాలి , నెత్తురు క్రక్కుకుంటూ

పేలి పోతాయి :

పగళ్ళన్నీ పగిలిపోయీ ,

నిశీథాలూ విశీర్ణిల్లీ ,

మహా ప్రళయం జగం నిండా

ప్రగల్భిస్తుంది :

*  *  *  *  *

నే నొక్కణ్ణీ ధాత్రి నిండా

నిండిపోయీ

నా కుహూరుత శీకరాలే

లోకమంతా జల్లులాడే

ఆ ముహూర్తా లాగమిస్తాయి :

*  *  *  *  *

నేను సైతం

ప్రపంచాబ్జపు

తెల్లరేకై పల్లవిస్తాను :

నేను సైతం

విశ్వ వీణకు

తంత్రినై మూర్చనలు పోతాను :

నేను సైతం

భువన భవనపు

బావుటానై పైకి లేస్తాను :

శ్రీశ్రీ -మహాప్రస్థానం  

అద్వైతం

ఆనందం ఆర్ణవమైతే ,
అనురాగం అంబరమైతే _
అనురాగపు టంచులు చూస్తాం ,
ఆనందపు లోతులు తీస్తాం .
నీ కంకణ నిక్వాణంలో,
నా జీవన నిర్వాణంలో ___
నీ మదిలో డోలలు తూగీ ,
నా హృదిలో జ్వాలలు రేగి ____
నీ తలపున రేకులు పూస్తే ,
నా వలపున బాకులు దూస్తే ____
మరణానికి ప్రాణం పోస్తాం ,
స్వర్గానికి నిచ్చెన వేస్తాం .
హసనానికి రాణివి నీవై ,
వ్యసనానికి బానిస నేనై _____
విషమించిన మదీయ ఖేదం ,
కుసుమించిన త్వదీయ మోదం ____
విషవాయువులై ప్రసరిస్తే ,
విరితేనియలై ప్రవహిస్తే ____
ప్రపంచమును పరిహసిస్తాం ,
భవిష్యమును పరిపాలిస్తాం
వాసంత సమీరం నీవై ,
హేమంత తుషారమ్ నేనై ____
నీ ఎగిరిన జీవవిహంగం
నా పగిలిన మరణమృదంగం _____
చిగురించిన తొటలలోనో
చితులుంచిన చోటులలోనో ____
వలయములై చలించినపుడే, విలయములై జ్వలించినపుడే _____

కాలానికి కళ్లెం వేస్తాం ,

ప్రేమానికి గోళ్లెం తీస్తాం .
నీ మోవికి కావిని నేనై ,
నా భావికి దేవిని నీవై ____
నీ కంకణ నిక్వాణంలో,
నా జీవన నిర్వాణంలో ___
ఆనందం ఆర్ణవమైతే ,
అనురాగం అంబరమైతే ____
ప్రపంచమును పరిహసిస్తాం ,
భవిష్యమును పరిపాలిస్తామ్ .

శ్రీశ్రీ -మహాప్రస్థానం