మెల్ల మెల్లగా - జోరు జోరుగా
మెల్లమెల్లగా వస్తోంది
చిట్టి పొట్టి అడుగుల చీమ నడకలు సాగిస్తూ
వస్తోంది నింపాదిగా
విత్తనంలోంచి ఎదుగుతున్న వృక్షం లాగా
సావకాశంగా పరిపక్వం అవుతూ
గర్భంలో పెరుగుతున్న పిండం లాగ
నిశ్చయంగా వస్తోంది
చీకట్ల గందరగోళం నుంచి
వేగుజుక్కలాగా నిరాఘాటంగా
ఇంతలోనే వేగం పుంజుకొని
జోరుజోరుగా వస్తోంది
నా గొంతుకలో ఉప్పొంగుతున్న
నినాదాల్లాగ రవళిస్తూ
తుఫానులో సముద్ర తరంగాల్లాగా లేస్తూ
ఒకదేశం నుంచి మరో దేశం దాకా
పెద్ద పెద్ద అంగలు వేస్తూ
నెత్తురు నాలుకలు చాస్తూ
ఒక జీవితాన్ని మరో జీవితానికి పెనవేస్తూ
వస్తోంది వస్తోంది విప్లవం
మహాకవి శ్రీశ్రీ - మరో ప్రస్థానం
