మేం హిందువులం.

బుధవారం 20 అక్టోబర్ 2010

మేం హిందువులం...

మేం హిందువులం.
మా మతం చాలా గొప్పది

మాకు వేదాలూ వద్దు ఉపనిషత్తులూ వద్దు
ఆగమాలూ నిగమాలూ వద్దు
ఆచారాలూ వద్దు విచారాలూ వద్దు
వాటిలో ఏముందో అసలే వద్దు
అయినా మేం హిందువులం

షడ్దర్శనాల పేర్లే మాకు తెలీదు
వాటికి కర్తలెవరో మాకనవసరం
మా ఋషులెవరో మాకు తెలీదు
వారేం చెప్పారో మాకసలే వద్దు
అయినా మేం హిందువులం

వేదాలు వేదాంగాలు పురాణేతిహాసాలు
యోగ తంత్రాది పరమేశ్వర ప్రోక్తాలు
ఇవన్నీ క్షుద్రపూజలు మాకొద్దు
ఇమాం భుకారీలు జాకీర్ నాయక్ లు మా గురువులు
మదర్ తెరెసా మా దైవం
మేం అసలైన హిందువులం

వారంలో ఒక్కరోజు గుడికెళ్ళొస్తాం
అక్కడ మా కోర్కెల చిట్టా చదివి వినిపిస్తాం
బేరం మాట్లాడుకుంటాం
వాడికిచ్చావ్ గా నాకెందుకివ్వవ్ అని బెదిరిస్తాం
ఇవ్వకపోతే దేవుణ్ణే మార్చేస్తాం
మేం నిజమైన హిందువులం

ఏడాదికోసారి విచిత్రవేషాలేస్తాం
దీక్షలు తీస్కుంటాం
మైకులు పెట్టి వికృత అరుపులతో
పూజలు చేస్తాం
ఆ నలభై రోజులూ ఇంట్లో ఆడాళ్లని
నానా హింసా పెడతాం
రోడ్ల పక్కన భోజనాలుచేస్తాం
ఆ ఖర్చులకోసం అందరినీ బెదిరించి
చందాలు వసూలు చేస్తాం
ఇదే మా హిందూమతం

పరాయి రాష్ట్రాల దేవుళ్ళను తెచ్చుకుంటాం
మా వార్షిక వ్యాపారానికి వాడుకుంటాం
మాల వేస్తే ఇంత తీస్తే ఇంత
డ్రస్సుకింత డప్పుకింత
బస్సుకింత బసకింత అని
బేరాలు కుదుర్చుకుంటాం
దీక్ష ఎప్పుడైపోతుందా అని వేచి చూస్తుంటాం
మాల తీసిన రోజే బారు షాపులకు పరిగెడతాంమా వేదాల్లోనూ ఉపనిషత్తుల్లోనూ
ఇలాగే చెయ్యమని వ్రాసుంది.

జీవితమంతా మాచే చీదరించుకోబడ్డ బిచ్చగాడు
ఇప్పుడు అఖిలాండకోటి బ్రహ్మాండనాయకుడు
ఎంగిలి సిగిరెట్లు తాగటం మానుకోలేనివాడు
ఎంతో గొప్ప సద్గురువు
మేం చెప్పినదే వేదం, ఇదే అసలైన హిందూ మతం
మేం హిందూమతోధ్ధారకులం.
ఇదే మా వ్యాపారం.

ఎవరైనా మీ అసలైన మతం
ఇది కాదురా బాబూ అని చెప్పబోతే
వాణ్ణో మాంత్రికుడని ముద్రవేస్తాం
వెకిలి కామెంట్లతో వేధిస్తాం బెదిరిస్తామ్
వాడేం చెబుతున్నాడో అస్సలు వినం
మాకు శ్రధ్ధా సబూరీలు చాలా ఎక్కువ
రౌడీయిజం మా గురువు చెప్పిన వేదం
మేం డాబా మీద నేర్చుకున్న మంత్రం

జీసస్ ని శిలువేసిందే మేము
మీరాని రాళ్లతో కొట్టిందే మేము
చైతన్యుణ్ణి చంపిందీ మేమే
మన్సూర్ తల నరికిందీ మేమే
సమ్మద్ ను, కోపర్నికస్ ను
జునాయడ్ ను, రబియానూ,
గురుగోవింద్ నూ, కబీర్ నూ
అంతం చేసింది మేమే
ఏ ప్రవక్తనైనా ముందు తిడతాం చంపుతాం
తర్వాత పూజిస్తాం, మా కోరికలకోసం
మేం గొప్ప అభ్యుదయ వాదులం

మేమే అసలైన హిందువులం
ఇదే అసలైన హిందూమతం
మా మతం చాలా గొప్పది.
అదేం చెప్పిందో మాకస్సలు తెలీదు
అది వేరే విషయం.

అయినా సరే
మేం హిందువులం.
మా మతం చాలా గొప్పది.
ఒప్పుకోకపోయావో నీ సంగతి చూస్తాం.